Sotuvchilar bilan shartnoma

Tahrir: 2026-yil 10-noyabr. Kuchga kirgan sana: saytda e’lon qilingan kundan.

Ushbu hujjat O‘zbekiston Respublikasi Fuqarolik kodeksiga muvofiq quyida rekvizitlari ko‘rsatilgan Platforma egasining OmadSavdo.uz’da tovar sotmoqchi bo‘lgan shaxslarga qaratilgan ommaviy ofertasi (agentlik shartnomasi) hisoblanadi.

1. Shartnomani qabul qilish (aksept)

1.1. Sotuvchi ro‘yxatdan o‘tish formasida yoki sotuvchi panelida “Shartnoma shartlarini qabul qilaman” belgisini qo‘yib tasdiqlagan paytdan shartnoma tuzilgan hisoblanadi. Aksept sanasi, vaqti, IP-manzili va shartnoma tahriri Platformada saqlanadi va dalil sifatida tan olinadi.

1.2. Yuridik shaxs yoki yakka tartibdagi tadbirkor (YTT) bo‘lgan Sotuvchi so‘roviga ko‘ra ushbu shartnomaning uning rekvizitlari ko‘rsatilgan nusxasi tuziladi va elektron raqamli imzo (E-IMZO) yoki qog‘ozda imzolanadi. Imzolangan nusxa ushbu oferta matniga to‘liq mos bo‘ladi.

2. Atamalar

• Platforma — omadsavdo.uz sayti va uning dasturiy ta’minoti; Platforma egasi — uning egasi va operatori.
• Sotuvchi — Platformada do‘kon ochgan va ushbu shartnomani qabul qilgan shaxs.
• Xaridor — Platforma orqali Sotuvchining tovarini buyurtma qilgan shaxs.
• Agentlik haqi (komissiya) — Platforma egasining xizmatlari uchun har bir sotuvdan olinadigan haq.
• Balans — Sotuvchining panelida ko‘rsatiladigan, unga o‘tkazilishi lozim bo‘lgan summa.
• Hisobot davri — kalendar oy.

3. Shartnoma predmeti

3.1. Sotuvchi topshiradi, Platforma egasi esa haq evaziga Sotuvchi nomidan va uning hisobidan quyidagilarni amalga oshiradi: Sotuvchining tovarlari haqidagi ma’lumotni Platformada joylashtirish; Xaridorlardan buyurtmalarni qabul qilish va Sotuvchiga yetkazish; Xaridorlardan tovar uchun to‘lovlarni qabul qilish (onlayn to‘lov tizimlari orqali) va ularni Sotuvchiga o‘tkazish.

3.2. Tovarni sotish-sotib olish shartnomasi Xaridor bilan Sotuvchi o‘rtasida tuziladi. Platforma egasi bu shartnomaning tarafi emas va tovar egasi bo‘lmaydi.

3.3. Xaridorlardan Sotuvchi foydasiga qabul qilingan mablag‘lar Platforma egasining daromadi hisoblanmaydi va Sotuvchiga tegishli. Platforma egasining daromadi — faqat agentlik haqi.

4. Sotuvchilar toifalari va maxsus shartlar

4.1. Yuridik shaxslar va yakka tartibdagi tadbirkorlar (YTT)

• Sotuvchi to‘lov sozlamalarida tashkilot nomi (YTT egasining F.I.Sh.), STIR, hisob raqami, bank va MFO kodini, shuningdek davlat ro‘yxatidan o‘tganlik guvohnomasi nusxasini taqdim etadi.
• Pul mablag‘lari Sotuvchining hisob raqamiga o‘tkaziladi.
• Platforma egasi har bir hisobot davri yakunida agentlik haqi bo‘yicha elektron hisob-faktura va agent hisobotini taqdim etadi.
• Sotuvchi tovar sotilishi bo‘yicha qonunchilikda belgilangan cheklarni (shu jumladan onlayn-NKM yoki virtual kassa orqali) Xaridorga berish majburiyatini o‘zi bajaradi.
• Nizolar O‘zbekiston Respublikasining iqtisodiy sudlarida ko‘rib chiqiladi.

4.2. O‘zini o‘zi band qilgan shaxslar

• Sotuvchi o‘zini o‘zi band qilgan shaxs sifatida soliq organida ro‘yxatdan o‘tgan bo‘lishi va uning faoliyati shu maqomda ruxsat etilgan faoliyat turlariga kirishi kerak.
• Sotuvchi JSHSHIR (PINFL), bank kartasi raqami va ro‘yxatdan o‘tganlik haqidagi ma’lumotnomani taqdim etadi. Pul kartaga o‘tkaziladi.
• Sotuvchi daromadi bo‘yicha cheklarni qonunchilikda belgilangan tartibda (“Soliq” ilovasi orqali) shakllantiradi va soliq majburiyatlarini o‘zi bajaradi.
• Maqom bekor qilinsa yoki daromad belgilangan chegaradan oshsa, Sotuvchi bu haqda 5 ish kuni ichida Platforma egasiga xabar beradi.

4.3. Jismoniy shaxslar (tadbirkor emas)

• Faqat o‘ziga tegishli shaxsiy buyumlarni vaqti-vaqti bilan sotishga ruxsat etiladi. Doimiy, tizimli savdo uchun qonunchilikka muvofiq YTT yoki o‘zini o‘zi band qilgan shaxs sifatida ro‘yxatdan o‘tish talab etiladi.
• Platforma egasi savdo hajmi yoki tovarlar soni doimiy tadbirkorlik belgilariga ega bo‘lsa, maqomni o‘zgartirishni talab qilish va to‘lovlarni maqom tasdiqlangunga qadar to‘xtatib turish huquqiga ega.
• Pul Sotuvchining kartasiga o‘tkaziladi. Qonunchilikda nazarda tutilgan hollarda Platforma egasi soliq agenti sifatida tegishli soliqni ushlab qoladi.
• Nizolar fuqarolik ishlari bo‘yicha sudlarda ko‘rib chiqiladi.

5. Agentlik haqi

5.1. Agentlik haqi har bir sotilgan tovarning sotuv narxidan foizda hisoblanadi va narxga qarab 15% dan 2% gacha silliq kamayadi:

5.2. Oraliq narxlar uchun aniq foiz tovar qo‘shishda sotuvchi panelida ko‘rsatiladi. Yetkazib berish narxi agentlik haqi hisoblanadigan summaga kirmaydi.

5.3. Do‘kon ochish, tovar joylash va sotuvchi panelidan foydalanish bepul. Platforma egasi alohida kelishuv bo‘yicha pullik xizmatlar (reklama joylari, aksiyalar) taklif qilishi mumkin.

5.4. Agentlik haqi stavkalari o‘zgarganda Sotuvchilarga kamida 15 kalendar kun oldin panel va e-pochta orqali xabar beriladi. Yangi stavka xabardan keyin berilgan buyurtmalarga qo‘llanadi.

6. Hisob-kitob tartibi

• 6.1. Buyurtma bajarilgandan (Xaridor tovarni qabul qilgandan) so‘ng uning summasi agentlik haqi ayirilgan holda Sotuvchi balansiga yoziladi.
• 6.2. Platforma egasi qaytarish muddati (10 kun) tugaguniga qadar tegishli summani ushlab turish huquqiga ega.
• 6.3. Sotuvchi “Pul yechish” bo‘limidan so‘rov yuboradi; so‘rov 3 ish kuni ichida ko‘rib chiqiladi va mablag‘ ko‘rsatilgan rekvizitlarga o‘tkaziladi. Minimal summa sotuvchi panelida ko‘rsatiladi. Bank o‘tkazmasi xarajatlari qonunchilik va bank tariflariga muvofiq.
• 6.4. To‘lovni Xaridor yetkazib berishda naqd yoki kuryer terminali orqali Sotuvchiga (yoki uning kuryeriga) to‘lagan bo‘lsa, agentlik haqi Sotuvchi balansidan chegiriladi. Balans manfiy bo‘lsa, Sotuvchi qarzni 10 kalendar kun ichida to‘laydi; to‘lanmaguncha Platforma egasi do‘konni vaqtincha to‘xtatishi mumkin.
• 6.5. Qaytarilgan yoki bekor qilingan buyurtmalar bo‘yicha summa (va agar qaytarish Sotuvchi aybi bilan bo‘lsa — xarajatlar) balansdan chegiriladi.
• 6.6. Har bir hisobot davri bo‘yicha savdo, agentlik haqi va to‘lovlar haqidagi hisobot sotuvchi panelida mavjud. Sotuvchi 5 ish kuni ichida yozma e’tiroz bildirmasa, hisobot qabul qilingan hisoblanadi.

7. Tomonlarning majburiyatlari

7.1. Platforma egasi

• Platformaning ishlashini, tovar sahifalari va buyurtmalarni qabul qilishni ta’minlaydi;
• Xaridorlardan qabul qilingan mablag‘larni ushbu shartnoma tartibida Sotuvchiga o‘tkazadi;
• Sotuvchi va Xaridor o‘rtasidagi nizolarda vositachilik qiladi;
• Sotuvchi ma’lumotlarining maxfiyligini ta’minlaydi.

7.2. Sotuvchi

• tovar haqida to‘g‘ri va to‘liq ma’lumot, haqiqiy rasm va narxni ko‘rsatadi, qoldiqni dolzarb holda saqlaydi;
• buyurtmani 1 ish kuni ichida tasdiqlaydi va kelishilgan muddatda (odatda 2 ish kuni ichida) jo‘natadi;
• Xaridorlarga chek beradi, kafolat va qaytarish bo‘yicha “Iste’molchilarning huquqlarini himoya qilish to‘g‘risida”gi Qonun talablarini bajaradi;
• zarur sertifikat, litsenziya va ruxsatnomalarga ega bo‘ladi;
• o‘z rekvizitlari va maqomi o‘zgarganda 5 ish kuni ichida panelda yangilaydi;
• Xaridorlarning shaxsiy ma’lumotlaridan faqat buyurtmani bajarish uchun foydalanadi va ularni uchinchi shaxslarga bermaydi;
• Xaridorlarni Platformadan tashqarida to‘lov qilishga undamaydi;
• o‘z daromadi bo‘yicha soliqlarni qonunchilikka muvofiq to‘laydi.

7.3. Sotuvchi mahsulot kartochkasidagi rasm va videolar “Rasm va video qoidalari”ga mos bo‘lishini kafolatlaydi: rasm va videoda telefon raqami, ijtimoiy tarmoq yoki sayt havolasi, boshqa do‘kon yoki marketpleys nomi va logotipi, haqiqatda mavjud bo‘lmagan sovg‘a, bonus va chegirma va’dalari bo‘lmaydi. Qoida buzilgan kartochka yashiriladi yoki tuzatish talab qilinadi; takror buzilganda Platforma 10-bo‘lim bo‘yicha choralar ko‘radi.

8. Taqiqlangan tovarlar

Qonunchilikda muomalasi taqiqlangan yoki cheklangan tovarlar, jumladan: qurol va o‘q-dorilar, giyohvand va psixotrop moddalar, retsept bo‘yicha beriladigan dori vositalari, litsenziyasiz alkogol va tamaki mahsulotlari, qalbaki (kontrafakt) tovarlar, o‘g‘irlangan buyumlar, shaxsiy ma’lumotlar bazalari, shuningdek axloq normalariga zid mahsulotlar.

9. Intellektual mulk

Sotuvchi joylagan rasm va matnlarga huquqi borligini kafolatlaydi. Sotuvchi Platforma egasiga ularni Platformada va uning reklamasida bepul ishlatish uchun shartnoma amal qilgan davrga nooeksklyuziv ruxsat beradi.

10. Moderatsiya va cheklovlar

Platforma egasi qoidaga zid tovarni yashirish yoki o‘chirish, qoidalarni qayta-qayta buzgan yoki Xaridorlarning asosli shikoyatlari ko‘p bo‘lgan Sotuvchining do‘konini vaqtincha yoki butunlay to‘xtatish huquqiga ega. Bunda bajarilgan buyurtmalar bo‘yicha hisob-kitob qilinadi.

11. Javobgarlik

11.1. Tovar sifati, xavfsizligi, uning tavsifi va Xaridor oldidagi kafolat majburiyatlari uchun Sotuvchi javobgar.

11.2. Sotuvchi aybi bilan Platforma egasiga yetkazilgan zarar (davlat organlari jarimalari, Xaridorga qaytarilgan summalar, sud xarajatlari) Sotuvchi tomonidan to‘liq qoplanadi.

11.3. Platforma egasi texnik uzilishlar va uchinchi shaxslar (to‘lov tizimlari, kuryerlik xizmatlari, internet provayderlari) harakatlari uchun javob bermaydi; uning javobgarligi oxirgi 3 oyda Sotuvchidan olingan agentlik haqi summasi bilan cheklanadi.

12. Fors-major

Tomonlar yengib bo‘lmaydigan kuch holatlari (tabiiy ofat, davlat organlari qarorlari, umumiy aloqa uzilishlari) tufayli majburiyatlarni bajarmaganlik uchun javobgar emas.

13. Muddat, o‘zgartirish va bekor qilish

13.1. Shartnoma muddatsiz tuziladi.

13.2. Platforma egasi shartnomani o‘zgartirishi mumkin; yangi tahrir kamida 15 kun oldin e’lon qilinadi. Sotuvchi yangi tahrirni panelda qabul qiladi; qabul qilmaguncha pul yechish to‘xtatib turiladi.

13.3. Sotuvchi istalgan vaqtda do‘konini yopib, shartnomani bekor qilishi mumkin — ochiq buyurtmalar bajariladi, qoldiq summa 6-bo‘lim tartibida to‘lanadi. Platforma egasi 13.2 va 10-bo‘limlarda nazarda tutilgan hollarda shartnomani bir tomonlama bekor qilishi mumkin.

14. Nizolarni hal qilish

Nizolar avval yozma talabnoma yo‘li bilan hal qilinadi (javob muddati — 10 ish kuni). Kelishuvga erishilmasa, nizo 4-bo‘limda ko‘rsatilgan sudda O‘zbekiston Respublikasi qonunchiligiga muvofiq ko‘rib chiqiladi.

15. Platforma egasining rekvizitlari